भ्रष्टाचार आरोपमा निलम्बन परिसकेका सिंहले पाए बहुदरमाईको हाकिमको जिम्मेवारी

Spread the love

वीरगञ्ज । भ्रष्टाचारको लागि बदनाम र भ्रष्टाचार मुद्दामा निलम्बनमा समेत परिसकेका उपसचिव राम विनय सिंहलाई पर्साको बहुदरमाई नगरपालिकाको प्रमुख प्रशासकीय अधिकृतको जिम्मेवारी दिइएको छ ।

लामो समयदेखि विवादित बहुदरमाई नगरपालिकाका प्रमुख प्रशासकीय अधिकृत मोहम्मद शेरे मुस्तफालाई सरुवा गर्दै सङ्घीय मामिला तथा सामान्य प्रशासन मन्त्रालयले भ्रष्टाचार मुद्दामा निलम्बन परिसकेका सिंहलाई प्रमुख प्रशासकीय अधिकृतको जिम्मेवारी दिएको हो ।

पर्साको तत्कालीन मिर्जापुर गाउँ विकास समिति वडा नम्बर ६, बघमरीस्थित एक झोले विद्यालयलाई रकम निकासा गरी भ्रष्टाचार गरेको अभियोगमा अख्तियार दुरुपयोग अनुसन्धान आयोगले तत्कालीन जिल्ला शिक्षा कार्यालयमा कामु जिल्ला शिक्षा अधिकृतका रूपमा कार्यरत सिंहमाथि भ्रष्टाचार मुद्दा दायर गरेको थियो ।

मिर्जापुरमा खडा गरिएको राम प्रावि नामको झोले विद्यालयलाई आर्थिक वर्ष ६४/६५ देखि ६९/७० रकम निकासा गरेको जनाउँदै अख्तियारले सिंहसहित तत्कालीन जिल्ला शिक्षा अधिकारी सदानन्द झासहित १० जनाविरुद्ध अख्तियारले भ्रष्टाचार मुद्दा दर्ता गरेको थियो ।

अख्तियारले दायर गरेको मुद्दाको आधारमा सिंह दुई वर्षका लागि निलम्बनमा समेत परेका थिए । यद्यपि भ्रष्टाचार मुद्दामा उनले सर्वोच्च अदालतबाट सफाई पाए । त्यसको केही समय पछि नै पुनः पर्साको जिल्ला शिक्षा अधिकारी बनेर आएका सिंह फेरी विवादमा तानिए । यस पटक उनमाथि विभिन्न जिल्लाबाट लगभग ४६ वटा जिल्लान्तर सरुवा र २२ जनालाई प्रावि, निमावि र माविमा राहत दरबन्दी सृजना गरेर करोडौँ रुपैयाँ असुल गरेको आरोप लगाएको थियो ।

तत्कालीन शिक्षा मन्त्री गिरिराजमणि पोखरेलबाट संरक्षण पाइरहेका सिंहले युनिसेफ, टिपीटी लगायतका कार्यक्रमहरू सञ्चालन नै नगरी सो बापतको बजेट कागज बनाएर अपचलन गरेको आरोप पनि लागेको थियो ।

त्यस्तै सङ्घीयता स्थापना पश्चात् गठन भएको जिल्ला शिक्षा समन्वय इकाई रौतहटको प्रमुखका रूपमा कार्यरत रहँदा सिंहले स्थानीय तहले गरेको सिफारिस विपरीत मनपरी ढङ्गबाट भवन वितरण गरेको आरोप लागेको थियो । सिंहले आर्थिक चलखेलको आधारमा राष्ट्रपति शैक्षिक सुधार कार्यक्रमअन्तर्गतको भवन वितरण गरेको बाहिरिएको थियो ।

रौतहट जिल्लास्थित फतुवा विजयपुर नगरपालिकाले विभिन्न विद्यालयलाई भवन निर्माणको योजना उपलब्ध गराउनको लागि नगरपालिकाको बोर्डबाट निर्णय गरेर गरिएको सिफारिस विपरीत सिंहले आर्थिक चलखेलको आधारमा मनपरी ढङ्गबाट भवनको योजना वितरण गरेको आरोप लागेको थियो ।

त्यस्तै, त्यसअघि बाराको जिल्ला शिक्षा अधिकारीका रूपमा कार्यरत रहँदा पनि सिंहले अनियमितता गरेको भन्दै अख्तियार दुरुपयोग अनुसन्धान आयोगले छानबिन गरेको थियो । सिंहविरुद्ध पटक-पटक उजुरी परेपछि छानबिन गर्न बारा जिल्ला पुगेको अख्तियारको टोलीले उनको कामकारबाही सन्तोषजनक नदेखिएको तथ्य समेत फेला पारेको थियो ।

सो बखत उनी काठमाडौँस्थित शिक्षक किताब खानामा सरुवा भएर जाँदा उनको ठाउँमा बाराको जिल्ला शिक्षा अधिकारी बनेर आएका जय प्रसाद दासलाई बरबुझारथ नगरी गएको अख्तियारले निष्कर्ष निकालेको थियो ।

समय-समयमा भ्रष्टाचार आरोप खेप्दै आएका र विवादमा मुछिँदै आएका सिंहले अब बहुदरमाई नगरपालिकाको प्रमुख प्रशासकीय अधिकृतका रूपमा के कस्ता काण्डहरू गर्दै छन् हेर्न बाँकी नै छ ।

https://www.facebook.com/v3.2/plugins/comments.php?app_id=2167983046752330&channel=https%3A%2F%2Fstaticxx.facebook.com%2Fx%2Fconnect%2Fxd_arbiter%2F%3Fversion%3D46%23cb%3Df0537b2829149bfe4%26domain%3Dyatradaily.com%26is_canvas%3Dfalse%26origin%3Dhttps%253A%252F%252Fyatradaily.com%252Ff232269112fed1fc1%26relation%3Dparent.parent&container_width=730&height=100&href=http%3A%2F%2Fyatradaily.com%2Fnews%2Fdetail%2F68966%2F&locale=en_US&numposts=15&sdk=joey&version=v3.2&width=